តើលោកបារ៉ាក់ អូបាម៉ា ឬលោកមីត រ៉ូមនីដែលនឹងក្លាយជាប្រធានាធិបតីទី៤៥របស់សហរដ្ឋអាមេរិក? លទ្ធផលនឹងអាចគេដឹងនៅយប់ថ្ងៃទី៦វិច្ឆិកាសប្តាហ៍ក្រោយនេះហើយ។
ការប្រកួតប្រជែងលើកនេះហាក់កំពុងតែតានតឹងជាងពេលណាៗទាំងអស់នៅក្នុងប្រវត្តិនៃការបោះឆ្នោតប្រធានាធិបតីអាមេរិក។
នៅឯគណបក្សប្រជាធិបតេយ្យ អតីតប្រធានាធិបតីអាមេរិកលោកប៊ីល គ្លីនតុន Bill Clinton បានចេញមុខជួយឃោសនាអោយលោកបារ៉ាក់ អូបាម៉ា Barack Obama ក្នុងក្តីសង្ឃឹមថា លោកអូបាម៉ានឹងអាចបន្តកាន់កាប់សេតវិមាន៤ឆ្នាំទៅមុខទៀត។ ចំណែកឯខាងគណបក្សសាធារណៈរដ្ឋវិញ លោកមីត រ៉ូមនី Mitt Romney គឺជាអ្នកជំនួញ ម្នាក់។ លោកធ្លាប់បានកាន់តំណែងជាអភិបាលរដ្ឋMassachusetts (២០០៣-២០០៧)។
រូបភាពនៃការឃោសនា
សារព័ត៌មាននៅសហរដ្ឋអាមេរិកបានផ្សាយការសិក្សាមួយដែលរកឃើញថា ការបោះឆ្នោតប្រធានាធិបតីអាមេរិកឆ្នាំ២០១២នេះមានតម្លៃរហូតដល់៦០០០លាន ដុល្លារ។ នេះគឺជាតួលេខនៃការចំណាយទៅលើការឃោសនាបោះឆ្នោតនៃបេក្ខជនទាំងពីរ។
នៅសហរដ្ឋអាមេរិក ការឃោសនាបោះឆ្នោតមិនមែនប្រព្រឹត្តិទៅដោយការផ្លាស់ទីនៃបេក្ខជន ប្រធានាធិបតីនិងការជួបជុំជាមួយអ្នកគាំទ្រតែប៉ុណ្ណោះទេ។ ប្រសិទ្ធិនៃការឃោសនាដើម្បីអោយសារ និងកម្មវិធីនយោបាយទៅដល់អ្នកបោះឆ្នោតនោះ គឺការធ្វើស្ពតពាណិជ្ជកម្មចាក់ផ្សាយតាមទូរទស្សន៍។ នៅពេលនោះហើយដែលការចំណាយសម្រាប់ការ ចាក់ ផ្សាយស្ពតឃោសនានោះមានទំហំធំ។
ស្ពតវីដេអូឃោសនាមានទម្រង់ដូចស្ពតពាណិជ្ជកម្មអីចឹងដែរ។ ក្នុងស្ពតខ្លះមានសម្ភាសន៍ប្រជាជនដែលនិយាយល្អអំពីបេក្ខជន ប្រធានាធិបតីរៀងៗខ្លួន ក្នុងស្ពតខ្លះទៀតបេក្ខជនប្រធានាធិបតីខ្លួនឯងនិយាយសន្យាអនុវត្ត កម្មវិធីនយោបាយរបស់ខ្លួនដើម្បីផ្តល់ប្រយោជន៍ដល់អ្នកបោះឆ្នោត។
ប្រជាពលរដ្ឋមានសេរីភាពក្នុងការបញ្ចេញមតិជាសាធារណថា ខ្លួនស្រឡាញ់បេក្ខជនមួយណា។ នៅតាមផ្លូវ រថយន្តខ្លះមានបិទឈ្មោះលោកអូបាម៉ា ឬលោករ៉ូមនី។ នៅតាមផ្ទះក៏ដូចគ្នា ឈ្មោះ និងរូបថតបេក្ខជនទាំងពីរត្រូវបានម្ចាស់ផ្ទះ បិទតាមកញ្ចក់ និងសរសេរដាក់តាំងនៅមុខផ្ទះក៏មាន។
អ្នកខ្លះដែលគាំទ្រលោកអូបាម៉ាបានពាក់អាវដែលមានសរសេរអក្សចំអកអោយ លោករ៉ូមនី។ អ្នកគាំទ្រលោកមីត រ៉ូមនីក៏ធ្វើដូចគ្នាដែរ។
មានរដ្ឋពិសេស៩ដែលបេក្ខជនទាំងពីរត្រូវប្រុងប្រយ័ត្ន
ក្នុងចំណោមរដ្ឋទាំង៥០របស់សហរដ្ឋអាមេរិក មានរដ្ឋខ្លះដែលប្រជាជនបោះឆ្នោតគាំទ្រគណបក្សប្រជាធិបតេយ្យជា រៀងរហូត និងមានរដ្ឋខ្លះទៀតប្រជាជនស្រឡាញ់គណបក្សសាធារណៈរដ្ឋរហូតដែរ។ ដោយឡែកមានរដ្ឋចំនួន៩ដែលរាល់ក្នុងបោះឆ្នោតម្តងៗ បេក្ខជនទាំងពីរត្រូវប្រកួតប្រជែងដណ្តើមប្រជាប្រិយភាពគ្នា។
រដ្ឋទាំង៩នេះហើយ ដែលពេលខ្លះ ប្រជាជនបោះឆ្នោតគាំទ្រគណបក្សប្រជាធិបតេយ្យ និងពេលខ្លះពួកគេបោះឆ្នោតគាំទ្រគណបក្សសាធារណៈរដ្ឋ។ ក្នុងចំណោមរដ្ឋទាំង៩នេះ អូហៃអូ Ohio គឺជារដ្ឋដ៏សំខាន់ជាងគេមួយដែលបេក្ខជនទាំងពីរត្រូវយកចិត្តទុកដាក់។ តាមប្រវត្តិនៃការបោះឆ្នោត គ្មានបេក្ខជនប្រធានាធិបតីណាមួយឈ្នះឆ្នោតបានធ្វើជាប្រធានាធិបតីដោយ មិនបានឈ្នះឆ្នោតនៅក្នុងរដ្ឋអូហៃអូនេះទេ។
ប្រព័ន្ធបោះឆ្នោតមុន Early Voting
នៅក្នុងបណ្តារដ្ឋភាគច្រើនក្នុងសហរដ្ឋអាមេរិក ការបោះឆ្នោតមុន Early Voting។ បានន័យថា រដ្ឋទាំងនោះបានអនុញ្ញាតអោយប្រជាពលរដ្ឋរបស់ខ្លួនអាចបោះឆ្នោតមុនថ្ងៃ បោះឆ្នោតផ្លូវការដែលត្រូវបានប្រកាសជាថ្ងៃទី៦វិច្ឆិកានោះ។ អាស្រ័យទៅតាមរដ្ឋទេ ការបោះឆ្នោតមុនត្រូវបានកំណត់១ខែមុន ឬយូរជាងនេះ។
អ្នកបោះឆ្នោតមានវិធី២បែបតាមតែពួកគេចង់។ ទីមួយពួកគេអាចទៅបោះឆ្នោតដោយផ្ទាល់ដល់កន្លែង។ ទី២ពួកគេអាចបើឆ្នោតតាមសារប៉ុស្តប្រៃយសណី។
ជាទូទៅមានមតិពីរដែលអត្ថាធិប្បាយទៅលើទៅប្រព័ន្ធបោះឆ្នោតមុននេះ។ ទីមួយជាមតិស្រប ដែលនិយាយថា វាជាការបង្កើនពេលវេលាបន្ថែមសម្រាប់អ្នកបោះឆ្នោត និងជាការលើកទឹកចិត្តអោយមានអ្នកចូលរួមកាន់តែច្រើន។ ប៉ុន្តែផ្ទុយវិញបានចាត់ទុក ប្រព័ន្ធបោះឆ្នោតបែបនេះអាចរំខានដល់ការសម្រេចចិត្តដ៏ត្រឹមត្រូវរបស់ អ្នកបោះឆ្នោត។ បានន័យថា វាជាការជំរុញអោយអ្នកបោះឆ្នោតប្រញាប់ទៅបោះឆ្នោតដោយមិនបានពិចារណា បានគ្រប់ជ្រុងជ្រោយ និងដល់ទីបំផុតទៅលើបេក្ខជនប្រធានាធិបតីនិមួយ៕
No comments:
Post a Comment