Phum Chas Dot Com: លោភលន់មិនខ្វល់ពីជីវិតអ្នកដទៃ! ចាក់ទឹកពោរពេញដោយមេរោគចូលសាច់ ដើម្បីបង្កើនទម្ងន់ ត្រូវសមត្ថកិច្ចបកស្បែក

យោងតាម Shanghai Daily, ស្ថានីយទូរទស្សន៍ CCTV រាយការណ៍ កាលពីថ្ងៃទី០៥ មករា ថា ពួកមន្ត្រីចិន បានឆ្មក់ចូលឃ្លាំងនៅក្នុងភូមិ១ ស្ថិតក្នុងស្រុក Baiyun ទីក្រុង Guangzhou និងបានរកឃើញកម្មករប្រុសៗកំពុងចាក់បញ្ចូលទឹកដែលពោរពេញដោយ បាក់តេរី (មេរោគ) ចូលក្នុងសាច់សត្វចៀមដែលបានសម្លាប់រួច, ដែលមធ្យោបាយ១ដើម្បី “បង្កើន” ទម្ងន់សាច់ និងលក់ទទួលបានតម្លៃខ្ពស់ ។

បុរសម្នាក់ដែលទទួលបន្ទុកនៃការងារ ល្មើសច្បាប់ និង កម្មករ ៦ នាក់ នៅក្នុងឃ្លាំងធ្វើសាច់សត្វខាងលើនេះ ត្រូវបានចាប់ខ្លួន ចាប់តាំងពីការឆ្មក់ចូលកាលពីថ្ងៃទី៣០ ខែធ្នូ កន្លងមកនេះ ។ ពួកមន្ត្រីបានរកឃើញសាកសពសត្វចៀមចំនួន ៣០ ក្បាល ដែលត្រូវបានចាក់បញ្ចូលទឹកកខ្វក់ ៦ គីឡូក្រាម, ចៀមនៅរស់ចំនួន ៣៣៥ ក្បាល ។
ជនសង្ស័យបានសារភាពប្រាប់ប៉ូលីសថា មានចៀមដែលត្រូវបានសម្លាប់នៅទីនោះក្នុង១ថ្ងៃ ប្រហែលជា ៥០ ទៅ ១០០ ក្បាល ។

ទឹកស្រេះដែលបំពេញដោយមេរោគ ត្រូវបានគេយកទៅចាក់បញ្ចូលក្នុងសាច់ចៀម មុនពេលឈាមកក, ហើយសាច់របស់វាបន្ទាប់មក ត្រូវបាននាំយកទៅលក់នៅឯទីផ្សារលក់សាច់, បណ្តាតូបលក់អាហារ, កន្លែងអាហារដ្ឋាន និងភោជនីយដ្ឋានជាច្រើន នៅក្នុងទីក្រុង Guangzhou, ទីក្រុង Foshan និងទីកន្លែងដទៃទៀត នៅក្នុងខេត្ត ។

សូមបញ្ជាក់ថា ទឹកដែលគេយកចេញពីក្នុងស្រះ, ត្រពាំងទាំងនោះ គឺមានផ្ទុកបាក់តេរីដែលធ្វើឲ្យអន្តរាយ ឬ គ្រោះថ្នាក់ធ្ងន់ធ្ងរ ចំពោះសុខភាពអ្នកបរិភោគ ៕